Herfs — Tyd om te laat gaan V

26 Mei 2021

“You never change your life
until you step out
of your comfort zone;
change begins at the end
of your comfort zone.”
― Roy T. Bennett —

Vir ŉ maand lank gesels ons oor HERFS as die seisoen wat ons leer om TE LAAT GAAN … en eerskomende Sondag sluit ons hierdie gesprek af met: HERFS weet iets moet verander.

Almal soek verandering. Niemand wil verander nie.

Ons kan voor ons heilige siele weet wat móét verander maar het gewoon nie die moed, dissipline, of deursettingsvermoë om uit ons gemaksone te stap nie.

Verandering gaan nooit gebeur as ons vir iets of iemand sit en wag om dit vir ons te doen, of wanneer dit ŉ ‘regte/beter’ tyd is om te verander nie. Met ander woorde — ek sit vir myself en wag om te verander.

► Verandering begin by my — en met die aanhoor hiervan sug ons met ŉ “Ja-ja, het dit ook al gehoor” en volg dit op met ŉ rede of verskoning waarom dit nie so maklik is nie, en dat my omstandighede eers moet ‘verander’ — ŉ ander werk, ŉ ander huis, ŉ ander vrou, ŉ ander land, ŉ ander lewe …

REALLY!? Moet ons eers wag vir iets ‘anders’ om te verander? Sal die boom wag tot die sneeu val voor hy sy blare afskud? Sal die swaeltjies wag tot die eerste winterreëns kom voor hul die langpad vat na waar dit somer is?

Wie is dieselfde as ŉ jaar gelede? Wie is daar wat nie terugkyk na ŉ dekade en wonder hoe het jy hier gekom deur alles wat verander het nie? Hoe is dit dat die lewe jou eenvoudig eers moet skoei en snoei voor ons sal verander?

Dink daaroor — alles om ons verander teen ŉ duisligwekkende pas. Hierdie versnellende verandering wag vir niemand nie.

Onthou jy ŉ tyd toe ons na ŉ foon met ŉ koord aan die muur moes stap om met iemand kontak te maak; ŉ seël op ŉ koevert moes plak om ŉ brief te stuur; ŉ tjek moes skryf as jy iets wou koop; en ŉ atlas moes gebruik om jou roete uit te werk?

► Verandering is konstant — ALLES verander aanhoudend, gedurig, herhaaldelik, sonder ophou.

Hoe gaan ons om met hierdie voortdurende verandering om ons? Sit ons en wag dat die lewe mý verander of neem ons verantwoordelikheid vir verandering? Is ek aktief betrokke om verandering te bewerkstellig, en hoe gaan ek sinvol om met veranderinge wat buite my beheer val?

“I can't change the direction of the wind, but I can adjust my sails to always reach my destination.” — Jimmy Dean

Hierdie mallemeule, rondomtalie, tiekiedraai reis wat ons LEWE noem, gaan nie net oor lesse leer nie maar om die LEWE in al sy kleure en geure te ervaar. Dit gaan nie net oor verandering nie, maar oor transformasie. Die LEWE gaan nie net om te sien nie, maar te voel; nie net droom nie, maar doen; nie net sê nie, maar wys; nie net bestaan nie, maar om te lewe in die volheid daarvan en in al sy skakerings.

Helaas, ons is gewoon te bang om buite die veilige sekerhede van ons sirkeltjie te stap. Ja, ons sal kla en kerm, protesteer en murmureer oor als wat moet verander solank iemand anders iets daaraan doen.

“I cannot change the world, but I can change the way I think about the world; and when I change the way I think about the world, suddenly the world changes.”

Hierdie aanhaling uit ‘A Course in Miracles’ was nog altyd ŉ kompas om te wys waar lê my Ware Noord.

Mens is nie altyd in beheer van goed wat gebeur nie, maar ek is altyd in beheer van hoe ek daarop gaan reageer.

Is it fight, flight, or freeze when things desperately need to change ...?

Die lewe is nooit stagnant nie. Dit vloei en beweeg, dit is soepel en aanpasbaar … dit verander, verfyn, vernuwe, verwerk, en verbeter.

► Verandering is ŉ keuse — dit is ŉ wilsbesluit. Dit gebeur een tree op ŉ slag, van oomblik tot oomblik … met kalmte en nugterheid, volharding en ŉ oopkop.

It’s not a matter of chance; it’s a matter of choice.

Dit is ŉ besluit wat sê: as ek struikel gaan ek dit deel van die dans maak. Waar ek nie verstaan nie gaan ek uitvind. Ek gaan aandagtig en bewustelik leef in die oomblik en my nie laat verlei deur skuldgevoelens oor gister of vrese oor môre nie.

“It is not the strongest of the species that survives, nor the most intelligent; it is the one most adaptable to change.” — Charles Darwin

Elke oomblik van hierdie dag is ŉ besluit om anders te kyk, anders te hoor, anders te dink, anders te voel, anders te reageer. Ek gaan nie wag tot omstandighede my dwing om te verander nie. Ek gaan nie wag tot ek mank op my knieë geslaan word voor ek iets gaan doen aan die situasie waarin ek is nie.