Jesus — Rabbi en Geneser IV

24 Maart 2021

“We might be wise to follow
the insight of the enraptured heart
rather than the more cautious reasoning
of the theological mind.”
― A. W. Tozer —

Ek glo in GOD — nie ŉ Apostoliese God, of Protestantse God, ŉ Joodse of Christen God nie. Daar is nie iets soos ŉ Christen God, of Hindu God, of Islam God nie. Daar is GOD. God is nie ŉ Jood of Christen nie … God is geen man, geen vrou, geen wit, geen swart … God is GOD.

Ek volg die Christen tradisie. In hierdie tradisie is Jesus die vergestalting van die Christus (Messias/Gesalfde) wat in sy leer en lewe vir ons kom wys het hoe lyk ŉ mens wat totaal gevul is deur God. Sy voorbeeld is ŉ refleksie van wat dit beteken om as ‘beeld van God, in die gelykenis van God’ (Gen 1:26) geskape te wees en wie se lewe ŉ getuienis is van God se teenwoordigheid.

Sy opdrag is eenvoudig: voed hulle wat honger is, klee die sonder klere, vergewe die skuldiges, verwelkom vreemdelinge, sorg vir die siekes, bewys medelye aan jou vyande, en doen aan ander wat jy aan jouself gedoen wil hê — hierin lê die liefde, vrede, vreugde, genade en erbarming van God.

Ek glo daar is niks wat ek kan doen om die liefde van GOD méér of minder te maak nie … en dat ek nie by magte is om God te affronteer of te irriteer nie. Trouens, ek glo lankal nie meer in ŉ God wat ŉ tantrum gooi as hy nie sy sin kry nie.

Ek glo in die allesinsluitende liefde van God.

“Hiervan is ek oortuig: geen dood of lewe of engele of magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.” — Romeine 8:38

God seën my nie omdat ek die regte goed doen of regte goed glo nie. God se seëninge hang nie af van wat jy glo of nie glo nie. God se seëninge is daar vir almal — and when I get my act together, and align my soul-mindedness with the WILL (splendour, desire, delight) of God, then I will see (experience) the blessings that have been there ALL THE TIME.

“Wie het vir die stortreën 'n pad oopgekap en vir die donderwolke hulle koers bepaal sodat dit reën in 'n land waar nie mense is nie, in 'n woestyn waar niemand woon nie en 'n droë, dor land deurnat word, sodat daar groen gras uitspruit?” — Job 38:25-27vv

Afhangende van die spesifieke Christen denominasie waaraan jy behoort, is die Bybel enige iets van 66 boeke in die meeste Protestantse Kerke tot 73 in die Katolieke Kerk en 81 boeke in die Ethiopies Ortodokse Kerk.

Vir my persoonlik is die Bybel, die Apokriewe Boeke, sowel as die Gnostiese Evangelies die basis-dokumente van my Christelike geloof. Soos reeds genoem, twyfel ek of nóg Jesaja, nóg Paulus te vinde daarvoor sou wees as jy vir hulle sou sê dat 2000 jaar later sal mense hul woorde lees as die ‘onfeilbare’ Woord van God.

Beide Ou en Nuwe Testament is geskryf in die taal van simbole, beeldspraak, en persoonlike ervarings om vir die lesers van die tyd ŉ rigtingwyser te wees na ŉ pad terug/met God. Om die waarheid te sê, ons kan net oor God praat in metafore.

Ek vat die Bybel baie ernstig op, maar lees nie als as histories-feitlik nie maar meer histories-metafories. Ek lees die Bybel as 'literatuur' waar ek dikwels tussen al die verskillende genres, as ek mooi lees, die Woord van God hoor. Hierin lê my eie ervaring met dit wat ek beskryf as ‘God’ — en dit is ŉ baie intieme verhouding, ŉ baie persoonlike reis.

“The Christian life is not believing in God or believing in the Bible or believing in the Christian tradition. Rather, the Christian life is about entering into a relationship with that to which the Christian tradition points, which may be spoken of as God, the risen living Christ, or the Spirit. And a Christian is one who lives out his or her relationship to God within the framework of the Christian tradition.” — Marcus Borg, ‘Meeting Jesus Again for the First Time’

Die Christen geloof is nie veronderstel om gebou te word rondom ŉ veilige klein nis nie. Nog minder dat ons die eienaars van die Waarheid is, en allermins nie dat my interpretasie van die Waarheid is die regte en enigste interpretasie nie.

Dit gaan nie oor hoe goed ék is nie maar oor hoe goed God is. Dit gaan nie oor hoe groot my sonde is nie maar om ten alle tye oop te wees vir die liefde van God sodat dit in en deur my kan vloei — Christianity is about learning to love like Jesus loved … and Jesus loved the marginalised and Jesus loved the broken.

Daarom vind ek my taak en roeping in die getuienis van Paulus soos Handelinge 20:24 dit verwoord:

“Maar al is my lewe vir my kosbaar, reken ek dit van geen belang nie as ek maar net my lewenstaak kan voltooi en die dienswerk wat ek van die Here Jesus gekry het, kan klaar maak: dit is om die evangelie van God se genade te verkondig.”

Hierin is Rabbi Yeshua van Nasaret my daaglikse inspirasie. In Christus lê my transformasie — my return, reset, rebirth, revival, and my reawakening. Hy wat in elke aksie en reaksie my herinner dat ek is ŉ Geliefde Seun van God wat almal om my sien as Geliefde Seuns en Dogters in wie God ŉ welbehae het.

Kom sluit Sondag by ons aan vir die laaste gesprek oor Jesus die Jood as ons praat oor die laaste week van sy lewe.

Mag die liefde van God oor jul harte en gedagtes die wag hou in Christus.

Terblanche

Terblanche is sedert September 2011 die geestelike leier van Neo-Spektrum.

GEDAGTE VIR DIE WEEK

“Christ is the link that keeps you
one with God, and guarantees
that separation is no more
than an illusion of despair,
for hope forever will abide in Him.”
― A Course in Miracles ―

Nuwe Sirkel-Flits is uit ... plus 'n paar ander belangrike skakels om te besoek: