Sondagdiens

1 Desember 2019

Hierdie week se liturgie: 1 Desember 2019

Die laaste maand van 2019 het aangebreek. Niemand weet mooi hoe ons hier gekom het nie, want dit voel soos gister toe ons die jaar begin het met drome, wense, en die mooiste intensies om die nuwe jaar anders te dink, anders te ervaar, anders te reageer, en anders anders lief te hê ... en voor ons onsself kon kry, is die jaar verby.

Ons gaan dié maand gesels oor ʼn paar bekende mense uit die geskiedenis — hulle aspirasies, inspirasies, en hul bydrae tot die geskiedenis waaruit ons iets kan leer. In die verhale van ander sien ons onsself. In hulle soeke, vind ons onsself. Hulle aksies en reaksies op die lewe se stroomversnellings en watervalle. word vir ons 'n brug.

Ons gaan begin met die lewe van Sir Charles Spencer Chaplin (Charlie) ... gebore op 16 April 1889 in Londen ... en seker die bekendste komedie-akteur en filmmaker in die geskiedenis van die film-industrie. Hy was wêreldwyd bekend en ʼn ikoon van die ‘silent film’-genre waarvan The Tramp steeds gesien word as die belangrikste bydrae tot die film-geskiedenis.

Hy was vier keer getroud en het 9 kinders en 16 kleinkinders gehad. Sy laaste vrou, Oona O’Neill, was 36 jaar jonger as hy en hulle was getroud van 1943 tot en met sy dood in 1977. Sy lewe in een sin, soos David Robinson dit verwoord in sy biografie oor Charlie Chapman — “The most dramatic of all the rags to riches stories ever told.” Toe iemand hom eenkeer gevra het hoe hy sy lewe sal opsom, het hy geantwoord, “A tramp, a gentleman, a poet, a dreamer, a lonely fellow, always hopeful of romance and adventure.”

Om op die ouderdom van 10 jaar oud die broodwinner te word nadat sy pa skielik oorlede en sy ma baie sieklik was, is iets wat min van ons sal verstaan. Om van daar jou pad oop te ploeg in ʼn tyd van die Groot Depressie, twee Wêreldoorloë en dan te verhuis na Amerika, sit nie in enige iemand se broek nie. Dit sou ʼn paar jaar wees alvorens hy dit vóór die kamera sou waag en daarmee ʼn nuwe genre begin het naamlik “Physical Comedy” — wat ook iemand soos Rowan Atkinson sou inspireer vir Mr Bean. Die gawe om met beweging, sonder enige dialoog, 'n storie te vertel, is ʼn gawe wat baie min akteurs het.

Sy repertoire as skrywer, komponis, digter, regisseur, musikant, en akteur is gewoon verbysterend en wie ook al films soos A Woman of Paris (1923), The Circus (1928 en eerste Oscar), en my persoonlike gunsteling, The Great Dictator (1940) gesien het, sal toegee dat Charlie Chaplin gewoon geniaal was in sy vakmanskap. Die kontroversie, die skandale, die misstappe en teleurstellings van sy lewe was alles kompos vir sy tuin van kreatiwiteit. Sy energieke entoesiasme en imponerende inspirasie was ʼn fontein van besieling vir baie akteurs wat ná hom sou kom. In 1992 het Sir Richard Attenborough ʼn film oor sy lewe gemaak, getiteld Chaplin met Robert Downey Jnr as Charlie Chaplin. Dit sou ʼn lewensverandering wees vir Downey, wat ook 'n paar toekennings sou wen vir sy vertolking. ʼn MÓÉT-sien film wat jy gerus kan koop vir jou versameling.

“A day without laughter is a day wasted”, “Nothing is permanent in this wicked world — not even our troubles”, “My pain may be the reason for somebody’s laugh. But my laugh must never be the reason for somebody’s pain.” — is ʼn paar van my gunsteling-Charlie Chaplin-aanhalings ... maar dit is sy gedig, “THIS IS LIFE” wat ons Sondag saam gaan lees en bespreek, want hierin hoor ek die fluistering van God —

Hoop om jou en jou gesin Sondag in ons Sirkel te verwelkom vir ʼn maand van dankie-sê, vir ʼn jaar wat met sy soet en suur, sy goed en sleg, sy hoogte- en laagtepunte ons gebring het na ʼn plek waar ons die jaar kan afsluit met waardering. Kom voed jou siel en kom word stil in die flikkering van kerse, die son deur rame, onder ʼn blou kruis.

Met liefde en seënwense vir jou week

Terblanche

Terblanche is sedert September 2011 die geestelike leier van Neo-Spektrum.

Naskrif: Die beste tonele uit Charlie Chaplin se films met sy stem wat praat oor sy lewe.
https://www.youtube.com/watch?v=f44_YBprib0