'n Nuwe Begin vir 'n Beter Jy II

Potgooi:

“Don’t wait for the perfect moment. Take the moment and make it perfect.”
— Zoey Sayward —

Een van die WhatsApp boodskappe wat ek ontvang het met goeie wense vir die Nuwe Jaar verwoord dit mooi —

Mag die son jou nooit skroei nie, en slegs warmte skenk in jou hart en mag jy geseënd voel as die reën op jou val;
As jy guns en gawes ontvang, neem dit met dankbaarheid en nederigheid;
As jy vriendskap ervaar, koester dit, en as jy liefde ervaar, vertroetel dit;
Mag jou bekers van geloof, hoop en liefde altyd gevul bly;
Mag die geskenke en lesse wat jy van die lewe ontvang, groter wees as dié wat met geld gekoop kan word.

Soos laas week genoem, is die woord wat ek hierdie jaar om my hart gaan weef: ‘abundance’ — i.e. om in die oorvloed van my menswees te gedy, en te floreer in die vervulling van 'n lewensvolheid.

1. Intellektuele Oorvloed

Dit is ŉ lewensingesteldheid van nuuskierigheid en verwondering, met ŉ verbeeldingryke belangstelling om te groei, en oop te wees vir nuwe idees.

Rolf Dobelli praat in sy boek ‘The Art of Thinking Clearly’ van —

“Embrace leaning as an ongoing journey, sharing knowledge freely, and recognising that there is always more to explore and understand.”

2. Emosionele Oorvloed

Dit is ŉ gesindheid wat dankbaarheid, vreugde, en vrygewigheid kultiveer. Dit is die vryheid om sonder perke lief te hê, om sonder huiwering te vergewe en om verhoudings diep te koester. Emosionele oorvloed gaan nie daaroor om nooit negatiewe emosies te ervaar nie, maar om te fokus op die vermoë om positief daarop te reageer.

3. Spirituele Oorvloed

In ŉ geestelike sin beteken ‘oorvloed’ om ŉ diep konneksie te voel met God, en om wat heilig is in alle aspekte van die lewe te erken, asook om te vertrou op die genoegsaamheid van liefde, innerlike vrede, en genade (grace).

Ek stem saam met Russel Brand as hy sê —

“Ons heg waarde aan als wat vlietend en tydelik is. Alles wat verganklik is, het ons heilig gemaak… en dit wat Heilig is, het ons ontheilig.”

Ons het Sondag na ŉ paar maniere gekyk hoe om ons wense, drome, hoop, en voornemens vir 2025 te verwesenlik:

Begin klein met haalbare mylpale om te verhoed dat jy oorweldig voel en dan moed opgee.
Wees spesifiek en kies net een of twee doelwitte waarvoor jy bereid is om verantwoordelikheid te vat en met dissipline kan volhou in jou elke dag se beplanning en roetine.
Vra jouself gereeld: “HOEKOM is dit belangrik vir my en HOE resoneer dit met my waardes en lewensdoel?”
Wees geduldig, en wees bereid om aanpasbaar te wees terwyl jy met ywer en deursettingsvermoë skouer aan die wiel sit om dit te bereik.
Visualiseer 'n positiewe uitkoms en vier elke klein sukses wat jou nader aan jou doelwit bring.

Wat hierdie jaar vir jou gaan bring, hang alles af van wat jý na die jaar gaan bring. As ŉ mens terugkyk na die jaar wat verby is, is dit seker ons almal se voorneme om meer te fokus op dit wat regtig belangrik is — en nie so vasgevang te wees in goed wat in die konteks van ŉ jaar, of ŉ leeftyd, géén betekenis het of waarde toevoeg nie.

In ŉ gesprek oor ‘abundance’ moet ŉ mens seker net eers weer begin by ons kernwaardes as die fondasie van ‘authentic living’ en waarom dit ALLES te doen het met ons wense, drome, en aspirasies vir hierdie jaar.

Vir my, is kindness ononderhandelbaar en moet dit deurslag vind in my verhoudings met mense en hoe ek my werk doen — VERAL as daar spanning of onsekerheid is.

Dit is soveel makliker om besluite te neem as dit belyn is met ons waardes.

Verder vra dit om te kan onderskei tussen ‘needs and wants’ — daar is baie goed wat ons wil hê maar het ons dit nodig? Ons het baie materiële behoeftes maar bring dit werklik vervulling vir jou as mens?

In ŉ verbruiker-samelewing is ons geneig om ‘trends’ te jaag wat vir ŉ rukkie ons gelukkig maak en dan moet ons dit weer vervang met nuwe toeters en belle (gadgets).

Hierdie jaar gaan ek meer belê in die rykdom van betekenisvolle vriendskappe en die welvaart van waardes wat die siel voed en ons menswees verryk.

Ons elkeen se lewensreis is uniek en kom met ŉ skat van lewenservaring. Ons besluite moet geanker wees in ons groter doel (true purpose) en hoe ons elke dag waarde toevoeg tot ander se lewe.

Nie meer onsself vergelyk met ander nie, ook nie onsself moet verduidelik of verdedig net sodat iemand ons nie sal veroordeel nie. Om dit ŉ jaar te maak waar ‘abundance’ beteken: ek hét, en ek ís, GENOEG.

Kom ons kyk Sondag na ŉ handvol maniere hoe ons ons beplanning en doelwitte vir die jaar nuwe inhoud en betekenis kan gee vanuit ŉ perspektief dat ek niks van dié jaar verwag wat ek nie self bereid is om te gee nie.

Met liefde, soos altyd