Geboorte en Wedergeboorte IV - 26 Apr. 2023

“Give, and it will be given to you. They will pour into your lap a good measure—pressed down, shaken together, and running over.”― Luke 6:38 —

Vir ŉ maand lank het ons gesels oor die invloed en betekenis van Paasfees op ons persoonlike lewe.

Die ganse skepping is in ŉ konstante staat van verandering en werk op die beginsel van geboorte-en-wedergeboorte (birth and rebirth) en nêrens is dit meer sigbaar as op hierdie wonderlike planeet waarop ons woon nie.

Ons liggame is voortdurend besig om te vernuwe, ons gedagtes en emosies ontwikkel en groei, en ons persoonlike verhoudings verdiep en verbreed die hele tyd.

Hierdie ‘wedergeboorte’ waarvan ons praat is nie ŉ eenmalige gebeurtenis nie, maar gebeur aanhoudend.

Elke dag is ŉ geleentheid om oor te begin, en dinge nuut en anders te doen. Ons ervaar ‘opstanding en wedergeboorte’ in die manier wat ons dink, glo, liefhet, en in die manier hoe ons omgaan met die wêreld om ons.

As Christene kyk ons na die leer en lewe van Jesus en sien dat die essensie van sy boodskap is: vernuwing en transformasie.

Hy moedig sy volgelinge aan om dit wat nie werk nie en wat maak dat ons ons doel mis te laat gaan vir ŉ nuwe manier van lewe wat gegrond is op liefde, vreugde, vrede, geduld, vriendelikheid, goedheid, getrouheid, sagmoedigheid, en selfbeheersing.

Vir ons is om ‘in Christus’ te leef ŉ essensiële deel van ons spirituele reis op Aarde. Dit is hier en nou waar ons met liefde, menswaardigheid, deernis, en respek dit moontlik maak vir ander om dieselfde ‘opstanding en wedergeboorte’ te ervaar. So kry ons lewe betekenis en leef ons ŉ vervulde bestaan.

Het jy al ooit gevoel dat jy 'n nuwe begin nodig het? Daai gevoel van ‘rock bottom’ as alles in jou lewe in- of uitmekaar val.

Miskien voel jy vasgevang in 'n groef of geboei deur jou omstandighede en verlang jy na 'n nuwe begin. Ons het almal oomblikke wanneer ons voel dat ons oor moet begin, die reset-knoppie moet druk en 'n nuwe pad vir onsself moet skep.

Hier is ŉ paar vrae wat jy êrens vandag vir jouself kan antwoord oor die doel, passie, en vreugde van jou lewe:

Noem vyf goed van jouself waarvan jy hou en vyf goed waarvan jy nie hou nie en wat wil jy anders doen?
Wanneer laas was jy buite jou gemaksone en het jy iets vir die eerste keer in jou lewe gedoen?
Wat sou jy sê is die goed wat waarde toevoeg tot jou lewe?
Hoe sou jy jou lewenskwaliteit beskryf en wat sal jy wil verander, en wat keer jou om dit te doen?
Wat sal jy doen as jy 'n paar maande oor het om te leef; hoe sal jy dinge anders doen; en hoekom dit nie vandag begin nie?

Die metafoor van kruis en graf in ons eie lewe is vir ons almal bekend. As ons eerlik is met onsself sal ons erken dat ons almal al die woorde van Psalm 22:1 geprewel het, “My God, my God, waarom het U my verlaat?”

Maar soos al dikwels gesê — met insig (waarheid) kom daar uitsig (wysheid). Uitsig bring insig, en insig gee ŉ groter uitsig, en so sien ons goed in perspektief, en waar ons goed in hul geheel kan sien, kom daar heling (wholeness and healing).

Wanneer gaan jy hierdie ‘rebirth, renewal, revival, transformation’ ervaar?

En die antwoord is: Wanneer jy dit WIL.

Neem 'n besluit en gaan soek in jou hart se spens na die krag van moed, dapperheid, en sterkte om doelgerig op te staan uit die dood en daai klip weg te rol.
Vat verantwoordelikheid vir jou aksies en reaksies, vir jou teleurstellings en mislukkings, jou emosies en gedagtes. Erken waar jy verkeerd was, leer daaruit, beweeg aan.
Laat los wat nie jou siel voed nie. Laat gaan die spyt en selfverwyt oor goed wat nie uitgewerk het soos jy gehoop het dit sal nie… gewoontes en obsessies wat jou gevange hou.
Maak tyd vir stilte sodat jy jou gedagtes, intensies, en energie kan fokus op jou selfwaarde, selfvertroue, en selfrespek.
Kweek 'n gesonde oordeelsvermoë om te kan onderskei tussen dit wat sinvol en dit wat onsin is.