Die pad terug na God V

25 Augustus 2021

“Gratitude makes sense of our past,
brings peace for today,
and creates a vision for tomorrow.”
― Melody Beattie —

Met ons Spirituele GPS in die hand het ons dié maand gesels oor: ŉ Pad terug na God.

Van OORGAWE na AANVAARDING na VERANTWOORDELIKHEID na VERANDERING, en eerskomende Sondag sluit ons die reis af by die laaste rigtingspunt naamlik: DANKBAARHEID.

Op universiteit is die drie geloofsbelydenisse van die kerk in ons ingedril. Ek kan min daarvan onthou, miskien te wyte aan die swaar kerklike taal waarin dit vertaal is uit die Duits, of miskien vanweë die feit dat ek toe reeds besef het dat ŉ geloofsbelydenis wat geskryf is in 1563 kan en mag nie die enigste of laaste woord wees wat ons geloof in, en ervaring met God verwoord nie.

Daar is wel ŉ paar goed wat ek onthou waarvan Sondag 1, Vraag 2 van die Heidelbergse Kategismus my nog altyd bybly —

Hoeveel dinge moet jy weet om salig te kan lewe en sterwe?
Antwoord: Drie dinge: Ten eerste, hoe groot my sonde en ellende is; ten tweede; hoe ek van al my sonde en ellende verlos word, en ten derde hoe ek God vir so ’n verlossing dankbaar moet wees.

Met ander woorde — ek moet wéét wat is die goed wat maak dat ek my doel (calling, purpose, vocation) mis; ek moet die pad terug na God kén met my hele hart, my hele siel, en met my hele verstand; sodat ek sal onthou om ŉ lewe van dankbaarheid (gratitude, appreciation, thankfulness) te lei.

► Een van die spirituele beginsels waarin ek nog altyd onwrikbaar glo, is — thankfulness releases the power of God.

— nie omdat God jou seën as jy dankbaar is nie (God het nie dankbaarheid nodig om God te wees nie) maar omdat dankbaarheid jou bewus maak van die seëninge van God wat reeds, en nog altyd, vir almal daar was.

► Dankbaarheid weet wanneer is genoeg, genoeg.

“Do not spoil what you have by desiring what you have not; remember that what you now have was once among the things you only hoped for.” ― Epicurus
“If you aren’t grateful for what you already have, what makes you think you would be happy with more.” ― Roy T. Bennett

► My dierbare pa het altyd gesê — “Maak dankbaarheid die kussing waarop jy elke aand kniel …”

Die mees sinvolle gebed het meer as dikwels net één woord, ‘DANKIE’ — en hierdie ‘dankie’ ontsluit ŉ ‘vrede’ wat alle verstand te bowe gaan (Filippense 4:7); en daardie ‘vrede’ bring ŉ ‘vreugde’ wat nie afhang van omstandighede nie (Habakuk 3:17-19).

► Give with joy … accept with gratitude

Wanneer ek met dankbaarheid en waardering van iemand iets ontvang, in daai oomblik, kry ek die mooiste en beste van wie en wat hulle is. Daardie gedeelde vreugde is ŉ vlam wat verlig (ligter maak) en verlig (verhelder).

“Two kinds of gratitude: The sudden kind we feel for what we take; the larger kind we feel for what we give.” – Edwin Arlington Robinson

Dit is ŉ vlam wat ons verwarm en beskerm. Dis ŉ vlam wat ons voed en suiwer. Dis ŉ vlam wat ons wys waar is die pad terug na God.

Helaas, ons vat baie dinge vanselfsprekend — ons gesin, vriende, ons gesondheid, die dak oor my kop, die kos op my bord, die motorsleutel in my sak, die kaart waarmee ek vir goed betaal. ÓF, miskien is dit die enigste goed waarvoor ek elke dag dankie sê …

… maar, kan jy ook dankie sê vir jou hartseer en verdriet omdat dit jou op ŉ punt van oorgawe gebring het? Kan jy dankie sê vir jou onsekerheid en twyfel omdat dit jou bring om eerlik met jouself te wees? Kan jy dankie sê vir jou siekte omdat dit jou nader aan jouself, jou medemens, en God gebring het?

► Dankbaarheid word gebêre in die spens van jou hart.

Dit verander weerstand in oorgawe, ontkenning in aanvaarding, onverskillig in verantwoordelik, stagnasie in verandering, onvergenoegd in dankbaarheid.

“The more grateful I am, the more beauty I see.” — Mary Davis

Dankbaarheid maak jou fisiese én jou spirituele sintuie oop. Ons sien die lewe in die algemeen en my lewe spesifiek anders as dit deur die bril van dankbaarheid bekyk word. Ons luister en hoor beter. Ons gevoel word nie gedryf deur emosies nie. Ons proe en ruik net soveel beter as dit kom uit ŉ plek van dankbaarheid.

Maak geen fout nie, dankbaarheid vorm die basis van jou verstandelike, fisiese, en geestelike welstand. Dit gee betekenis. Dit help jou om sin te maak en koers te hou wanneer alles om ons wegval.

Maar dankbaarheid is ook ŉ dissipline. Dit is iets wat jy kweek, koester, en kultiveer. Soms raak ons so verdwaal in die loopgrawe van ons kop.

Kom ons sluit Sondag hierdie maand se tema af met ŉ fontein van dankbaarheid.

Ons laat die leivore van waardering toe om te vloei na die beddings van ons huis en die boord van ons werk en vriendekring.

Vandag kies ek om te fokus op dankbaarheid, want sien — my seun is vandag 23 jaar oud.

Met 'n hart vol waardering

Soos altyd