“You dance love, and you dance joy, and you dance dreams. And I know if I can make you smile by jumping over a couple of couches or running through a rainstorm, then I’ll be very glad to be a song and dance man.” — Gene Kelly

Kyk na dié video en sien wat Gene Kelly bedoel ............
https://www.youtube.com/watch?v=D1ZYhVpdXbQ

Ons gesels die maand oor — LA DANSE DE LA VIE (die dans van die lewe) — en het laas week afgesluit met die aanhaling van Friedrich Nietzsche, “And those who were seen dancing were thought to be insane by those who could not hear the music.” Op ʼn ander plek sê hy, “We should consider every day lost on which we have not danced at least once.”

Eerskomende Sondag gaan ons praat oor: OM TE DANS IN DIE REËN ... soos in die video hierbo, nie bang vir natreën of druppels op ons gesig nie. Nie versigtig vir deurweekte skoene of bekommerd oor ʼn deurweekte pak klere nie. Ons dans ... selfs as dit reën. Nee, VERAL as dit reën! Dit maak nie saak of jy van die ritme af is nie. Dit maak nie saak of jy weet hoe nie. Dit maak nie saak of jy ʼn fool van jouself maak nie. Dit is JOU dans. Dit is JOU oomblik. En ons dans.

Ons dans om die ritme van ons hart te voel. Ons dans om te onthou dat ons lewe. Ons dans vir die liefde wat in en deur ons vloei en wanneer ons met iemand anders dans, hoop ons dat hulle dit ook sal voel. Vir ʼn oomblik het ons die luukse om onsself te wees. Geen maskers of pretensie, geen voorgee of ontkenning nie. Min mense waag dit om hulself so bloot te stel voor ander en die wat doen, is onvoorwaardelik vry. Vry vir die ritme van Lewe. Vry vir die puls om te wees wie ons gebore is om te wees.

Kyk weer na die video van Gene Kelly as hy sing, “Dancing in the Rain” maar dié keer sit die klank af. Kyk net en sien hom dans. Dis asof sy liggaam die musiek word. Sit dan weer die musiek aan en sien hoe sy liggaam ʼn ekstensie word van wat jy hoor. Die een is geweef in die ander. Die musiek en die dans is in harmonie en die reën is die genot van die siel. Oorloop ... oorvloed ... oorgenoeg!

Dit was Michael Jackson wat gesê het, “To live is to be musical, starting with the blood dancing in your veins. Everything living has a rhythm. Do you feel your music?” Of soos Deepak Chopra dit mooi verwoord, “Our biological rhythms are the symphony of the cosmos, music embedded deep within us to which we dance, even when we can't name the tune.”— Die musiek verskil van tyd tot tyd ... soms is dit ʼn mars en dan weer ʼn wals; soms is dit ʼn passievolle tango en dan is daar dae waar dit niks meer is as net ʼn wiegelied nie. Hoe dans ons wanneer dit reën, of maak ons die vensters en deure toe en bly liefs binne? Party is bang hul word siek as hul in die reën dans en ander het soveel fobies dat hul glo dis acid-rain en niemand moet met die gif in aanraking kom nie. Maar die meeste dans — ja, die oorgrote meerderheid van mense het geleer om in die reën te dans.

Hoe doen hulle dit? Hoe kry mense dit reg om te dans as hul hartseer is? Hoe dans mense wanneer die lewe se tifone en orkane op hul neerstort?
Kom ons verken Sondag ʼn paar ritmes vir dae waarin donderwolke saampak en ons goeie intensie wegspoel in geute van onsekerheid:

[1] Verander die perspektief (change of heart) — die probleem is dat wanneer ʼn krisis op ons toesak, raak ons so vasgevang in die maalstroom dat ons niks meer sien vir wat dit is nie. Ons staan met ons neus teen die ruit en wasem alles uit fokus. Zoom uit ... sien die prentjie vir wat dit is. ʼn Nuwe perspektief bring ʼn ander gesindheid. ʼn Ander, gesonde gesindheid bring dankbaarheid en dankbaarheid bring ʼn blydskap (joy!) wat nie afhang van hoe gelukkig (happiness) jy is nie. Dis ʼn vreugde wat hou tot lank na dit ophou reën het  --
“Wees altyd bly in die Here! Ek herhaal: Wees bly! Wees inskiklik teenoor alle mense. Die Here is naby.” (Filippense 4:4-5)

[2] Verander die ritme (change of pace) — so teen die einde van die jaar haal ons ons mensmasjien uit rat en hou vakansie met die hoop om te herlaai voor die nuwe jaar ons weer aan die kraag gryp. Dis ook die tyd van die jaar waar daar gesing word, “VREDE op aarde in die mens ʼn welbehae!” Die vraag is, hoe maak ons vrede as ons nie in vrede met onsself is nie, en hoe leef ons in daardie vrede as ons deur konflik gejaag word? --
“Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou.”(Filippense 4:6-7)

[2] Verander die musiek (change the tune) — jy gaan nie dans op “Nothing Compares 2 U” (Sinéad O'Connor) as jou hart gebreek is nie, en jy gaan beslis nie jou voete gelig kry deur te luister na “Money For Nothing” (Dire Straits) as jy nie weet hoe jy jou finansiële verpligtinge gaan nakom nie. Miskien dan eerder “Walking on Sunshine” (Katrina & The Waves) of “Eye of the Tiger” (Survivor). Wanneer emosionele storms op ons toesak, is dit tyd om die musiek te verander. Vat die fokus na dit wat positief en opbouend is. Vermy die dryfsand. Hou op kerm oor geute wat lek. Waag dit om in die reën te dans --
“Verder, alles wat waar is, alles wat edel is, alles wat reg is, alles wat rein is, alles wat mooi is, alles wat prysenswaardig is – watter deug of lofwaardige saak daar ook mag wees – daarop moet julle julle gedagtes rig.” (Filippense 4:8)

Kom word vir ʼn uur saam met ons stil Sondag. Wie weet, miskien is ons gelukkig en reën dit vir ʼn uur lank.

GEDAGTE VIR DIE WEEK
“Life is a dance.
​Mindfulness is witnessing that dance.”
― Amit Ray ―

A COURSE IN MIRACLES
Ons hervat weer volgende jaar
na die Somervakansie
[Lees asseblief steeds
elke dag 'n stukkie uit ACIM]